Бөлүмдөр
Бейшемби, 22-август
Нарын облусуКочкор району 20.07.2018 16:59

Айыл турмушу: Жумушсуз кыйналган К.Бейшенбиев балдары теңдүүлөр менен окуп, ширетүүчү болгон (сүрөт)

Turmush -  Кочкор районуна караштуу Кара-Саз айылынын 48 жаштагы тургуну Канат Бейшенбиев үй-бүлөсүн ширетүүчүлүк менен багып келе жатат. Аны менен аймактык кабарчы таанышты.

Канат Бейшенбиев Кочкор айылында туулган.

«Союз тараган соң жумушсуз калдым. Таякелерим жашаган Кара-Саз айылына көчүп барып, батирде жашап жүрдүк. Балдарым жаш эле. Райондогу ишке жайгаштыруу бөлүмүндө жумушсуз катары каттоого туруп, алар жиберген жакка барып иштеп жүрдүм. Кез-кез кыйналганда сеп этем. Айылда “жөө молдо” деген имам бар эле. “Жолумду ачып бер” десем, “Каке ичпе сага кудай берет. Дөөтүгө жакында” деди. Эмне кылсам деп ойлонуп жатып, ширетүүчүлүктү тандадым. Андан мындан кылып ширетүүчү аппарат жасап чыктым. Айылдагы тургундардын майда-чүйдөсүн ширетип берип, бирин-экин тыйын таап үй-бүлөмдү бага баштадым. Алгач көзүмдү алдырып алып жүрдүм. Бара-бара көндүм», - деди ал.

Канат Бейшенбиев 2002-жылдары Кочкордогу Ж.Тойгомбаев атындагы №15 кесиптик лицейде жаш балдар менен бирге окугандыгын кошумчалады.

«Айылдан 20 чакырым алыс, шайтан араба менен барып келип окуй баштадым. Кээде өзүм теңдүүлөр жок, жаш балдар менен окугандан уялам. Ошентип жүрүп электро монтер, ширетүүчү деген кесипке ээ болдум. Жер бөлдүрүп алып там салдым. Араба, күрөк, тырмоо, меш, тосмо , мончого меш сыяктуу айылга керектүүлөрдү жасап берем. Үйлөргө жылуулук түтүкчөлөрүн коюп, суу киргизип берип сантехниктин жумушун да кылам. Кээ бирөөсү карызга, айрымдары акчага жасатат. Былтыртан бери өзүм мончо салып кардарларга жагып кызмат көрсөтүүдөмүн. Кудайга шүгүр жашоом акырындап оңолуп келе жатат.

Эки уулум, бир кызым бар. Уулдарымды да өзүм окуган кесиптик лицейден окуттум. Кийин кайсы окууну кааласа окуп алышар. Колуктум Гүлнура Ибраимова ушул Кара-Саз айылынын кызы, мен жокто мончо жагып, үй оокаттарын жасайт. Үйгө ичимдик деле жолотпойбуз», - дейт К.Бейшембиев.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×