Бөлүмдөр
Ишемби, 24-август
Нарын облусуКочкор району 20.03.2019 11:48

Айыл турмушу: О.Болотов суу керектөөчүлөргө 30 жылдан бери кызмат кылып келет (сүрөт)

Turmush -  Кочкор районунун тургуну Осмонкул Болотов райондук «Таза-Суу» ишканасында 30 жылдан бери иштеп келет. Ал ишиндеги сыймыктуу жана түйшүктүү күндөрүн аймактык кабарчы менен бөлүштү.

Осмонкул Болотов кесиби боюнча куруучу, 1989-жылдан бери Кочкор райондук «Таза-Суу» ишканасында инженер, мастер жана жетекчилик кызматтарда иштеген. Ал «сенин алган билимиң кесип эмес, кайсы тармакта иштесең ошол кесибиң болуп саналат» деп айтып келет.

Ар бир кесип ардактуу

- 30 жылдан бери райондогу ишканада эмгектенип келе жатам. Бул жылдар аралыгында инженер, мастер жана жетекчилик кызматтарды аркаладым. Элге кызмат көрсөтүп, таза суу берген ишканада иштегениме сыймыктанам. Ар бир иштин оңой жагы жок эмеспи. Андыктан биздин жумуш деле оор. Бул мекеме айлык акыны суу керектөөчүлөр төккөн каражаттын эсебинен беришет. Жаңы иштеген жылдары эл ичкен сууга акча төкпөй, акысыз иштеген күндөрүбүз болгон. Анысы аз келгенсип, айрым суу керектөөчүлөр «кудайдын бекер суусун сатасыңар» деп нааразы болушчу. Ал кезде сууну үйүнө киргизгендер аз болчу. «Элүү жылда эл жаңы, жүз жылда болот жер жаңы» демекчи, учурда эл туура түшүнүп калды. Мындан 10 жыл мурун суу түтүктөрүн оңдоодо жерди техниканын жардамысыз кол менен казчубуз. Өз жаныңды тобокелге салууга туура келет. Себеп дегенде суу түтүгү асфальттын астында жайгашкандыктан асфальтты казууга да болбойт. Ошондо жердин капталын оюп казчубуз. Бош топурак иштеп жаткан балдарды басып кала жаздаган учурлар болгон.

Тетик издеген күндөр

- Оңдоо иштеринде түтүктөгү буроолорду темир ара менен кесип, айтор жумуштардын баары кол менен жасалчу. Азыр техника келип, ишибиз жеңилдеп калды. Кочкор районундагы суу түтүктөр союз убагында орнотулган. Жыл өткөн сайын темирдин тетиктери да өзгөрөт экен. Айрым учурда бузулган жерди оңдоодо тетиктер туура келбей, аларды Бишкектен же Ысык-Көл облусунан издеп, сатып алып келебиз. Тетиктер өлчөмүнө жараша бааланат. Район элине сууну үзгүлтүксүз берүү үчүн болгон аракетибизди кылуудабыз. Суу түтүгү жарылганда айрым учурда 2-3 күн бою оңдоого туура келет. Тейлөөчү ишкана болгондуктан суу керектөөчүлөр менен тил табышып иштешүүбүз зарыл. Ичүүчү сууну сугат үчүн пайдалангандар да бар. Аларга чара көрүлөт.

Осмонкул Болотов 4 баланын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×