Бөлүмдөр
Бейшемби, 22-август
Нарын облусуКочкор району 14.05.2019 15:55 На русском

Айыл турмушу: Малдын мүйүзүнөн жаныбарлардын статуэткасын жасаган А.Жакыпбаевдин чеберчилиги

Асанбек Жакыпбаев
Асанбек Жакыпбаев

Turmush -  Кочкор районунун Шамшы айылынын 59 жаштагы тургуну Асанбек Жакыпбаев малдын мүйүздөрүнөн ар кандай буюмдарды жасоо менен алек. Элеттеги уста менен аймактык кабарчы таанышты.

Асанбек Жакыпбаев союз ураганга чейин мал доктур болуп иштеген. Союз ыдырагандан тарта чарбачылык жана устачылык менен алек болуп, үй-бүлөсүн багып, бутунан тургузган.

«Кесибим боюнча мал доктур болуп көп жыл иштедим. Союз тарагандан кийин шартка байланыштуу устачылык өнөргө аралашууга туура келди. Бул аралыкта айылдаштарым үчүн үйгө керектелүүчү буюмдарды жасап, устачылык өнөргө аралаштым. Бирок устачылык канымда бар, ата-бабамдан калган өнөр», - дейт элеттик уста.

Ал учурда малдын мүйүздөрүнөн азем буюмдарды жасап, пайда табууда.

«Мындан 15 жыл мурун Бишкектеги соода борборунан жыгачтан, мүйүздөн жасалган жаныбарларды көрүп, мен да жасасам болот экен деп ойлондум. Ошол мезгилде элдик көл өнөрчүлүк жаңыдан гана жанданып келе жаткан. Сатуучу аялдан "мен да жасап келсем аласыздарбы?" десем. Ал "мындай буюмдарды кыргыз эркектери жасай албайт. Эгер жасасаң алып келип көр" деп койду. Мен жыгачтан барстын башын жасап алып бардым. Ал "баштан башка дагы эмне жасай аласың, ушул элеби?" деп сурап туруп алды. Кийинкисинде арстан өгүздү басып жыгылган көрүнүштү жыгачтан оюп жасап, көркүн чыгарып алып бардым. Ошондон тартып ал буюртма бере баштады. Бул чакан ишкерчилик десем да болот. Устачылык менен үй-бүлөбүздү багып баштадык», - деп кошумчалады ал.

Устага жубайы, баласы да жардам берип, чогуу иш алып барышат. Көчмөндөр оюндарына колунан чыккан эмгектерди алып барып, элдик өнөрчүлүк боюнча сынакта 1-орунду алып келген.

«Малдын мүйүзүнөн жаныбарлардын бардыгын жасап, сатыкка коёбуз. Кыргыз көчүн чагылдырып баргам. Акыркы убакта кыргыз көчүнө суроо-талап көбөйүүдө. Керектүү мүйүздөрдү сатып алам же талаадан таап алып колдонобуз», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×