Бөлүмдөр
Бейшемби, 22-август
Нарын облусуКочкор району 20.05.2019 15:31 На русском

Айыл турмушу: Веложарышта 1-орунду алган М.Абдылдаев велосипеддин жардамы менен эки оорудан айыккан

Turmush -  Кочкор районунун тургуну Мурат Абдылдаев 54 жашта. Аны велоспортчу десек да жарашат. Ал веложарышта жаш атаандаштарын артта калтырып, 1-орунду алган. Аны менен аймактык кабарчы таанышты.

Мурат Абдылдаевдин айтымында, бала кезден велосипед тээп чоңойгон. Кийин велосипедден унаага өтүп, велосипедди такыр эле унутта калтырып койгон.

«Көпчүлүк балдардай эле мен да велосипед тээп чоңойдум. Кийин унаалуу болгондо велосипед эстен чыгып кетти. Мындан 4 жыл мурун кырсыктап, тизем кыймылдабай, гипсте 1 жыл жатып калдым. Аракет кылып, тиземди бүгүп кыймылга келтирдим. Ошондон баштап ар дайым кыймылдатып туруу үчүн велосипедди 51 жаш курагымда кайрадан тээп, машыга баштадым. Азыр район ичинде унаа айдабай эле велосипед менен жүрүүнү адатка айландыргам. Велосипед менен жүрүп эки оорудан айыга алдым. Кежигемде туз уюп, катуу болуп калган. Остеохондроз менен жабыркап жүрчү экенмин. Учурда остеохондроздон толук айыктым. Экинчиси ийиндериме жел туруп чыкпай калган. Анын кесепетинен эки колум тең жогору көтөрүлбөй, абдан ооручу», - деди ал.

Мурат Абдылдаев күз айында Ысык-Көлдү 7 күндө айланып келген.

«Тер менен кошо жел чыгып кетиптир, колум жакшы болуп калды. Велосипеддин ден соолукка тийгизген таасири абдан сонун экенине ынандым», - деди Мурат Абдылдаев.

31-май — Бүткүл дүйнөлүк тамеки тартууга каршы күрөшүү күнүнө карата Кочкор районунда вело сүйүүчүлөр үчүн жарыш болуп өттү. Анда мектеп окуучуларынан тарта чоң адамдарга чейин күч сынашкан.

Жыйынтыгында биринчи болуп Рахат Садыков, экинчи Мурат Абдылдаев келди. Катышуучуларга диплом акчалай сыйлык, кубок тапшырылды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×