Бөлүмдөр
Дүйшөмбү, 23-сентябрь
Нарын облусуКочкор району 04.09.2019 17:04 На русском

«Башыбызга топурак түшөт»: Кара-тоолук окуучулардын арманы

Turmush -  Кочкор районуна караштуу Семиз-Бел айыл өкмөтүнүн Кара-Тоо айылындагы Ш.Абдылдаев атындагы орто мектеп авариялык абалда.

Аталган мектеп 1927-жылы ашар жолу менен балдар үйүнө ылайыкталып курулган. Бирок мектеп катары пайдаланылып келет.

«Ш.Абдылдаев атындагы орто мектебинин имараты авариялык абалда. Пайдубалы жерге чөгүп, дубалы чалкалап, дубал менен шыптын ортосу 3-7 см ачылып кеткен. Жыл сайын оңдоо иштери жасалып, жыртык-тешигин бүтөйбүз. Бирок жаңы окуу жылынын башталышына жетпей эле шыбактары урап баштайт. Шыптар тактайлардан урулуп жасалган экен. Ортолору ачылып, бөлмөлөргө топурак түшүп жатат. Эски мектеп болгондуктан шарттарды өзүбүз түзүп жатабыз. 2015-2017-жылдары райондук өзгөчө кырдаалдар бөлүмү "адам өмүрүнө кооптуу, имарат авариялык абалда" деп бүтүм чыгарып берген. Окуучулардын жана өзүбүздүн жаныбызды тобокелге салып келебиз.

Мектеп куруу боюнча Билим берүү жана илим министрлигине, өкмөткө, президентке кайрылуу жасаганбыз. Шайлоо болордо мектеп куруу боюнча убадалар айтылып, тапшырмалар берилет. Бирок көп жылдан бери эч бир жыйынтык жок. Мектептин долбоорун даярдаганбыз. Мектеп салууга жерди трансформациялап, 2019-2020-жылдын бюджетине киргизип беришсе эле иш башталганы турат», - дейт мектеп директору Талгар Исаев.

Окуучулар да жаңы мектептин курулушун чыдамсыздык менен күтүп жатышат.

«Класстын ичинде отурганда башыбызга топурак түшөт. Кышкысын суук болот, башыбызга топу, куртка кийип отурабыз. Кошумча китептерди окуйлу десек окуу залыбыз жок. Ал эми дене тарбия сабагында эшикке чыгып машыгабыз. Кар жааганда же шамал болгондо класста сүйлөшүп отурабыз. Шарттар жок болгондуктан ар кандай кароо-сынактарда алдыңкы орундарды албай калуудабыз», - деди мектеп окуучулары.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×